"Lai Tau Ang Jo Den”

 "Lai Tau Ang Jo Den” 

Izet tu Alah  Tatangkok

By. Firman Sikumbang

"Lai tau ang jo den ?“ Kato-kato nan maluncua dari “muncuang buruak” pareman nan mangaku hobinyo mabuak jo bacakak tu, dalam tigo hari ko viral di media sosial.

Kato-kato tu maluncua dari muncuang paja nan banamo Izet ko katiko inyo manggaretak sopir truk di PT Semen Padang mamintak paso uang takuik ka sopir tu, Sabtu 10 Juli 2021.

Aksi basitegang urek mariah tu--karano paja sopir ko mangaku pitih e indak ado lai doh--tanyato direkam dek kawan nan duduk disampaing sopir tu.

Dek kanai soting perai tu--sasudah tayang di media sosial—akia e namo Izet ko ngetop, bairing-iriang top e jo namo Aldebaran.

Cilakonyo, dek maraso basengoh, sasudah kajadian tu nyo ampai malarian diri dek si Izet ko, satidaknyo paja tu ingin mailang dari “mato Polisi”.

Tapi tantu indak Polisi namonyo kok ka kalah pulo dari paja “gadang rarau” ko. 

Diam-diam keberadaan Izet ta pantau dek Polisi di Kabupaten Tanah Datar. Akianyo inyo ditangkok hari Kamih 15 Juli 2021, jam 06.00 WIB, dimano sabalunnyo pado Rabu malam sakitar jam 23.30 WIB inyo sempat malarian diri.

Indak lamo sasudah ditangkok dek anggota Reserse Kriminal Polda Sumbar tu, Izet dibao ka kantua Polda Sumbar di Padang.

Direktur Reserse Kriminal Umum (Ditreskrimum) Polda Sumbar, Kombes Pol. Imam Kabut Sariadi hari Kamih magakui baso Izet ko alah ditangkok.

“Izet diamankan di Jorong Supayang, Nagari Tabek Patah, Kecamatan Salimpauang, Kabupaten Tanah Datar, saat ini sedang dalam perjalanan menuju Padang. 

Salanjuik nyo, petugas akan melengkapi berkasnyo dan menyerahkan pelaku ke Polresta Padang untuk ditindaklanjuti,” kecek Imam Kabut Sariadi ka wartawan.

Liau ko mangecekan, pasal nan ka disangkakan ka si Izet tu adolah pasal 368 KUH Pidana, karano mamaso urang jo caro kareh sarato ancaman kekerasan, supayo urang maagihan sesuatu nan inyo punyoi, dengan ancaman salamo 9 tahun panjaro. Asai lah....! 


Post a Comment

0 Comments