Motor Punyo Yudo Dibaok Raun Rang Gilo

Motor Punyo Yudo Dibaok Raun Rang Gilo

Sungai Limau, Pionir—Buyuang Kareot (indak namo sabananyo doh) maraso lamak raun-raun-raun jo motor bajenis Supra X Nopol : BA 3771 FL, nan dimulai dari Unit Pelaksana Teknis Daerah (UPTD) Sanggar Kegiatan Belajar (SKB) di Tanah Lapang, Kuranji Hilir, Kecamatan Sungai Limau, Kabupaten Padang Pariaman.

Gaya bana paja tu tampak basamo motor bawarna hitam nyo tu. Baa ka indak, katiko raun-raun tu paja nan baumua sakitar 18 tahun tu mamakai sarawa pendek kotak-kotak nan disabuik jo istilah anak mudo kini 'Plaid', pakai sipatu pulo lo tuh langkok jo kaus kakinyo. Sudah tu, pakai pulo jaket kulik, sarato helem. Yo tampak coga bana paja tu nyoh !

Tapi agak babeda snek jo urang kabanyakan sadang mambaok motor. Paja ko malah manulak motornyo tu, sambia mangaluan suaro motornyo dari muncuangnyo surang: “ngeeeeeng......, ngeeeeeng......, ngeeeeeng......” kecek paja tu sambia malayok-layokan stang motornyo.

Samantaro, di hari nan samo, Kamis 10 Maret 2022, surang laki-laki banamo Yudo Tri Wicaksono, tibo-tibo kalangkabuik karano manarimo kanyataan motor nan diparkirannyo di UPTD SKB Tanah Lapang, Kuranji Hilir indak adoh di tapek lai doh. Padohal inyo maninggaan motornyo dek karano adoh urusan sabanta, dek itulah jaket kuliknyo pun digantuangnyo di stang motornyo tuh, samantaro stang motor indak dikuncinyo doh !

Maraso motornyo alah dicilok urang, akianyo Yudo Tri Wicaksono malaporkan kajadian tu ka Polsek Sungai Limau, Polres Padang Pariaman, Polda Sumatera Barat (Sumbar).

Manarimo laporan tu, Kapolsek Sungai Limau Iptu Umar Yani langsuang mamarintahkan anggotanyo untuak bagarak capek, saindaknyo barupayo mamblokir wilayah supayo urang nan macilok motor tu indak lolos dari wilayah hukumnyo.

Tanyato indak butuah wakatu lamo doh, Bripka Syafri Nofiardi nan marupoan Babinkamtibmas Polsek Sungai Limau berhasil manangkok urang nan diduga alah mancilok motor bajenis Supra X Nopol : BA 3771 FL tu.

Sakitar 500 meter dari UPTD SKB Tanah Lapang, Kuranji Hilir, Bripka Syafri Nofiardi maliek anak mudo sadang manulak motor tu sambia mangaluan suaro dari muncuangnyo surang: “ngeeeeeng......, ngeeeeeng......, ngeeeeeng......”

Anak mudo tu langsuang dibaok basarato motor tu dek Bripka Syafri Nofiardi ka Polsek Sungai Limau untuak dipareso.

Setelah dibaok bacarito sarato ditanyo-tanyo dek patugeh Polisi, tanyato paja ko jaka sembung bawa golok, alias gak nyambung goblok!

Kecek Kapolsek Sungai Limau Iptu Umar Yani, tanyato paja tu orang dengan gangguan jiwa (ODGJ).

“Lantaran anak muda tersebut diduga kuat adalah ODGJ, kita langsung berkoordinasi dengan dinas terkait. Sementara motor tersebut kita kembalikan pada pemiliknya,” kecek Iptu Umar Yani manjalehan. (febriansyah fahlevi/Firman Sikumbang)

Post a Comment

0 Comments