PAJA NAN MANGAKU BUTO TU TANYATO BADUTO

PAJA NAN MANGAKU BUTO TU TANYATO BADUTO

PADANG Pionir--- Alun lamo ko sabuah video surang laki-laki jo muko badarah-darah viral di sosial media (medsos). Dalam video tu, paja nan diketahui banamo Awaludin Rao tu mangaku incek matanyo diantak dek patugeh nan sadang bajago di Pos penyekatan PPKM Darurat di perbatasan Kota Padang jo Kabupaten Solok, Jumat (16/7/2021) sakitar jam 02.30 WIB malam.

Dalam video tu inyo mangecekan kelua dari Kota Padang untuak maliek oto truknyo nan tabaliak. Tapi ditagahan dek patugeh nan sadang dineh malam tu.

"Akhirnyo saya didorong pak, saya megang pena pak. Tertusuk ke mata saya, sudah buta saya pak," kecek paja ko bantuak nan ka iyo pulo Inyo pun manyabuikan baso kumandan nan sadang bajago tu adolah Nesmon, bapangkek AKP.

"Demi Allah, demi Rasulullah SAW. Saya didorongkan oleh anggota pak Nesmon. Mata saya buta. Masuk pena satu pak. Ini darahnya semua pak," kecek paja ko sambia mancaliakan darah di mukonyo tu.

Urang nan disabuik paja tu tanyato Kapolsek Lubuk Kilangan AKP Liya Nesmon SS, SH. Ka Pionir nan datang manamui Nesmon, Salasa 21 Juli 2021, mangaku binguang mancaliak kajadian tu, sabab indak sorang pun adoh patugeh nan manundoan paja tu doh.

Katiko pakaro tu dipareso dek Polda Sumbar, akianyo katauan baso paja nan marupoan mantan anggota DPRD Tapanuli Selatan, Sumatera Utara nan kanai pecat tu sadang baduto. Kanyataan tu diakui dek Kabid Humas Polda Sumbar Kombes Pol Stefanus Satake Bayu Setianto ka wartawan koran ko.

Kecek Satake, paja tu tanyato baduto. Inyo pun maminta maaf atas kajadian nan mambuek heboh tu. Samantang bantuak itu, kecek Satake, proses hukumnyo tatap jalan.

“Saat ini kasus video yang diduga menyebarkan berita bohong tersebut sudah ditangani Direktorat Kriminal Khusus Polda Sumbar. Kita akan tindaklanjuti, saat ini kasus dipegang penyidik di Ditkrimsus," kecek Satake manjalehan. (Firman Sikumbang)

Post a Comment

0 Comments